Stálu raftækjum og skiptimynt

Brotist var inn í félagsheimilið á Flúðum aðfaranótt föstudags og stolið þaðan þremur fartölvum, tveimur skjávörpum, myndbandsupptökuvél, fjarstýringum og lítilræði af skiptimynt.

Samkvæmt upplýsingum lögreglunnar á Selfossi spenntu þjófarnir upp hurð á bakhlið hússins sem liggur bæði að félagsheimilinu og kennsluaðstöðu sem grunnskólinn á Flúðum notast við.

Þá var gerð tilraun til að brjótast inn í verslunina í Árnesi og telur lögregla ekki ósennilegt að sömu menn hafi verið þar á ferð.