Tveir teknir með amfetamín

Tveir menn voru handteknir í heimahúsi í vesturbæ Hafnarfjarðar í fyrrinótt. Lögregla var kvödd á staðinn vegna kvartana um hávaða í íbúðinni. Þegar lögreglumenn bar að garði voru átta manns í húsinu. Vöknuðu grunsemdir meðal lögreglumannanna um að ekki væri allt með felldu og fundust fimmtán grömm af amfetamíni við leit.

Tveir voru sem fyrr segir handteknir vegna málsins. Þeim var sleppt úr haldi síðdegis í gær að loknum yfirheyrslum. Málið telst að fullu upplýst.