Ekið á 16 kindur við Búðardal

Ekið hefur verið á sextán kindur á þjóðveginum við Búðardal síðustu daga. Lögreglan á staðnum telur féð hafa verið að flækjast á veginum vegna þess að vegakantar séu iðagrænir af fallegu grasi um þessar mundir.

Eðli málsins samkvæmt sækir féð í þá af miklum móð. Vegagerðin slær kantana á sumrin en leyfir þeim að vaxa á öðrum árstíðum og því eru þeir eftirsóknarvert beitiland eins og er. Engin slys hafa orðið á fólki en jeppi skemmdist töluvert þegar hann ók á kind á Laxárbrú.