Vörnin skilaði Stjörnunni góðum sigri

Leikur Stjörnunnar og FH í Ásgarði í DHL deild kvenna í handbolta var nokkuð jafn framan af fyrri hálfleik. Staðan 7-5, Stjörnunni í vil þegar korter var liðið af leiknum. Leikurinn var nokkuð harður og kom það svolítið niður á gæðum handboltans. Staðan í Hálfleik var 11-10, Stjörnunni í vil.

Stjörnustúlkur komu gríðarlega sterkar inn í seinni hálfleik og komust í 16-11 á fyrstu tíu mínútum leiksins. Þar skipti mestu góð vörn og frábær markvarsla Jelenu Jovanovic. Eftir þetta var ekki spurning hvar sigurinn myndi enda og unnu Stjörnustúlkur sannfærandi sigur 25-21.

Aðalsteinn Eyjólfsson var að vonum ánægður með sína leikmenn eftir leikinn.

"Það var frábært að sjá stelpurnar hér í kvöld. Þær tóku sig verulega á eftir tvo slaka leiki og ég er hæstánægður með þær. Við spiluðum góða vörn og markvarslan var einnig frábær. Mér fannst við vera mun betri allan seinni hálfleikinn og að mínu mati verðskulduðum við þennan sigur."