Sony reiðir Vatíkanið

Það er viðbúið að keppinautar innan tölvuleikjaiðnaðarins lendi upp á kant við hvorn annan öðru hvoru. Annað er í raun ómögulegt á þessum stóra markaði þar sem risar ráða völdum. En það er önnur saga þegar tölvuleikjafyrirtæki fara að reita kirkjuna til reiði, og móðga marga strangtrúaða einstaklinga í heiminum. Það er nákvæmlega það sem Sony hefur gert. Ný auglýsing sem var gerð til að fagna 10 ára afmæli Playstation tölvunnar víðfrægu hefur valdið miklum usla í Ítalíu og Vatíkanið hefur opinberlega fordæmt þessa auglýsingu. Sony hefur núna tekið auglýsinguna úr umferð og beðist afsökunar. Auglýsingin sem um ræðir birtist í fjölmörgum tímaritum og dagblöðum í Ítalíu. Á henni er mynd af ungum manni með sauðslegt bros og þyrnikórónu á hausnum, þar sem þyrnarnir mynda form kassa, hrings, þríhyrnings og X, en þetta eru þau merki sem hafa skreytt console fjarstýringar Playstation tölvanna frá upphafi.  Fyrir neðan myndina stendur síðan: "Dieci anni di passione" sem þýðir í raun "10 ár af ástríðu".  "Nú hafa þeir einfaldlega gengið of langt" segir Antonio Sciortino, ritstjóri kaþólsks trúarrits í Ítalíu. Þegar þessi frétt er skrifuð hafa yfirmenn Sony dregið auglýsinguna úr umferð og beðist afsökunar.