Kennsl borin á fyrstu líkin

Kennsl voru í gær borin á fyrstu lík fórnarlamba hryðjuverkanna í London á fimmtudag. Susan Levy 53 ára, tveggja barna móðir, lést í mannskæðustu árásinni, á Piccadilly-leiðinni þar sem 21 lét lífið. Eiginmaður hennar og sonur höfðu leitað hennar öllum stundum þar til þeim var tilkynnt um lát hennar. Önnur kona, Gladys Wundowa, 51 árs, var einnig meðal hinna látnu. Lögreglan staðfesti í gær að í það minnsta 52 létust í sprengingunum á fimmtudag, þremur fleiri en áður hafði verið gefið út. Sir Ian Blair, yfirmaður Lundúnalögreglunnar, sagði þó að sú tala ætti eftir að hækka. "Við leitum þá ábyrgu uppi hvar sem þeir eru og unum okkur ekki hvíldar fyrr en við höfum fundið þá og komið þeim undir hendur réttvísinnar," sagði Tony Blair, forsætisráðherra Bretlands, í ræðu í breska þinginu. Hann sagði líklegast að íslamskir öfgamenn hefðu staðið að hryðjuverkunum. Lögreglan lokaði götum nærri aðsetri forsætisráðherrans og fleiri stjórnarbyggingum um hálftíma skeið eftir að grunsamlegur pakki fannst.