Vottar fjölskyldum látinna samúð

Elísabet önnur Bretadrottning sendi frá sér tilkynningu í kjölfar hryðjuverkaárásanna í gærmorgun. Í tilkynningunni segir: "Hræðilegir atburðir morgunsins hafa skotið skelk í bringu okkar allra. Ég veit að ég tala fyrir munn allra landsmanna þegar ég votta samúð mína öllum þeim sem urðu fyrir árásunum og skyldmennum þeirra sem létust og særðust. Ég dáist að þeim sem sinna neyðarstörfum á vettvangi." Drottningin dvaldi í Windsor-kastala eftir árásirnar í gær og var öryggisgæsla hert við heimili hennar í Buckinghamhöll.