Leituðu torfærukappa á Suðurlandi

Björgunarsveitir í Árnessýslu voru kallaðar út á þriðja tímanum í nótt til að leita að fimm mönnum á torfærumótorhjólum. Þeir höfðu lagt af stað frá Gjábakkavegi um fjögurleytið í gær og ætluðu norður að Hlöðufelli og niður hjá Miðdal en skiluðu sér ekki á ætluðum tíma. Um 25 björgunarsveitarmenn komu að leitinni og fundu þeir mennina laust fyrir klukkan sex í morgun heila á húfi í Dalbúðarskála við Kerlingu. Þeir voru þá orðnir bensínlitlir eftir að hafa lent í mjög erfiðu færi. Eldsneyti var komið til þeirra í morgun og þeir aðstoðaðir við að komast til byggða.