Fischer flýgur heim frá Malmö

Skákmeistarinn Bobby Fischer flýgur heim til Íslands frá Malmö í Svíþjóð en ekki Kaupmannahöfn eins og til stóð. Ástæðan er sögð vera þoka og gat þota sem flytja á Fischer til Íslands ekki lent í Kaupmannahöfn. Flugvél Fischers frá Japan lenti á fjórða tímanum á Kastrup-flugvelli í Kaupmannahöfn en hann fór ekki sömu leið og aðrir farþegar heldur var honum fylgt frá flugvélinni af nokkrum lögreglumönnum og öryggisvörðum á flugvellinum og upp í lögreglubíl. Hann skipti svo um bíl og er nú kominn til Malmö þaðan sem hann flýgur til Íslands. Fischer hitti fornvin sinn Sæmund Pálsson á flugvellinum í Kaupmannahöfn og féllust þeir í faðma og felldu tár við endurfundina.