Skemmtilegt safn

Safnið var opnað formlega 1987 en hefur á undanförnum árum verið að taka breytingum til hins betra. Safnið skiptist í fjóra hluta, og segir Íris Ólöf Sigurjónsdóttir, sem tók við safninu fyrir þremur árum alla hluti tengjast Svarfaðardal á einn eða annan hátt.

"Fyrsti hlutinn er náttúrugripasafn, með uppstoppuðum refum og ísbirni. Í Svarfaðardal er elsta friðland fugla á landinu og þess vegna er gaman að tengja um 100 uppstoppaða fugla safnsins friðlandinu," segir Íris.

Annar hluti safnsins er tileinkaður frægum Svarfdælingum og er af nógu að taka. "Þekktastur er sennilega Jóhann Svarfdælingur Pétursson, betur þekktur sem Jóhann risi. Hann var um tíma hæsti maður heims, 2,34 metrar á hæð. Í stofunni hans er hægt að horfa á heimildarmynd um hann auk búta úr kvikmyndum sem hann tók sjálfur, enda mikill áhugamaður um kvikmyndir.

"Þá er einnig að finna minningarstofu um Kristján Eldjárn forseta, sem fæddist á Tjörn í Svarfaðardal og þá hefur séra Friðrik Friðriksson, sem fæddist að Hálsi, einnig sinn skáp. Þriðji hlutinn er síðan hefðbundið byggðasafn, með munum úr heimilishaldi og atvinnuháttum Svarfdælinga.

Fjórði hlutinn var nýlega opnaður en hann er helgaður því að sjötíu ár eru liðin frá því jarðskjálftinn mikli reið yfir. "Þar má meðal annars finna gamlan jarðskjálftamæli frá Veðurstofu Íslands auk þess sem hægt er að lesa minningar þess fólks sem lenti í þessum jarðskjálfta," segir Íris Ólöf og bætir því við að safnið hafi alltaf verið vel sótt.