Gjörbreytt íslandsmót á næsta ári

Tillaga um breytt keppnisfyrirkomulag á íslandsmótinu í handbolta liggr fyrir og verða þær kynntar á ársþingi HSÍ næsta laugardag. Yfirgnæfandi líkur eru á að hún verði samþykkt. Tillagan sem kynnt verður á ársþinginu á laugardag kemur frá nefnd sem var skipuð í framhaldi af formannafundi sem haldinn var þann 12. febrúar sl. Felur hún í sér miklar breytingar, þar sem sú stærsta er líklega sú að úrslitakeppnin góða, sem skorið hefur úr um íslandsmeistara mörg undanfarin ár, er úr sögunni. Þess í stað verður tekin verður upp einföld deildarkeppni þar sem það lið sem fær flest stig mun standa uppi sem Íslandsmeistari. Er þetta samskonar fyrirkomulag og er við lýði í mörgum stærstu deildum Evrópu, t.d. þýsku og spænsku úrvalsdeildinni. Fari því svo að tillagan verði samþykkt munu öll fjórtán lið landsins koma saman í einni deild á næsta ári þar sem keppt verður tvöföld umferð, heima og að heiman. Að sögn Einars Þorvarðarsonar, framkvæmdastjóra HSÍ, stóð sambandið nýlega fyrir skoðanakönnun fyrir þjálfara og forsvarsmenn handboltafélaga þar sem niðurstöður sýndu að vilji er innan hreyfingarinnar að setja Íslandsmótið í efstu deild karla í tvær deildir. Að sögn Einars mun það ekki geta gerst fyrr en á næsta ári en fyrihugað sé að sex lið verði felld að loknu mótinu á næsta ári, gangi tillagan í gegn. Það sé hinsvegar ekki fyrr en á Ársþinginu að ári sem að sú tillaga verður tekin fyrir. "Hugmyndin er þá að tímabilið 2006-2007 verði leikið sé í tveimur deildum þar sem átta lið skipi efstu deild. Þá verði leiknar þrjár umferðir þar sem innbyrðis viðureignir liða í fyrstu tveimur umferðunum ráði til um hvar viðureign liðanna í þriðju umferð fer fram. Þannig þurfa liðin að hugsa um úrslit allt mótið og markatalan er farin að skipta máli frá fyrsta leik," segir Einar. Áætlað er að deildarkeppninni sjálfri með slíku fyrirkomulagi verði lokið um miðjan apríl. Í tillögunni er ennfremur að finna hugmyndir um svokallaðan Deildarbikar sem færi fram strax að loknu íslandsmóti og tæki 2-3 vikur. Í honum hefðu fjögur efstu lið deildarnnar þáttökurétt og myndi sigurvegarinn öðlast þáttökurétt í EHF keppninni. Íslandsmeistari öðlast að sjálfsögðu rétt í Meistarakeppni Evrópu og liðið í 2. sæti deildarinnar tekur þátt í Áskorendakeppninni. Þá verður óbreytt fyrirkomulag á bikarkeppninni þar sem sigurvegari öðlast þáttökurétt í Evrópukeppni Bikarhafa. Einar segir að tillögurnar hafi þegar verið kynntar fyrir forsvarsmönnum félaga landsins og að flestir þeirra hafi tekið mjög vel í breytingarnar. Og ef tekið er mið af þeim miklu gagnrýnisröddum um núverandi deildarfyrirkomulag verða að teljast yfirgnæfandi líkur á að breytingartillagan nýja verði samþykkt á ársþinginu.