Fékk stungusár í brjóstkassa

Karlmaður á fimmtugsaldri var fluttur á slysadeild í dag með stungusár í brjóstkassa eftir að sambýliskona hans kastaði hnífi í hann. Að sögn lögreglu lenti fólkið í orðaskaki á heimili sínu í Breiðholti á ellefta tímanum í morgun sem endaði með því að konan greip til eggvopnsins og kastaði því í manninn. Hann hringdi á lögregluna sem kom á staðinn stuttu síðar til að skakka leikinn. Maðurinn var fluttur á slysadeild þar sem gert var að sárum hans en meiðslin reyndust minniháttar. Konan var hins vegar flutt á lögreglustöðina við Hverfisgötu þar sem tekin verður skýrsla af henni í kvöld eða á morgun. Að sögn lögreglu var fólkið í annarlegu ástandi.