Dramatískt jafntefli gegn Tékkum

Ísland náði jafntefli gegn Tékkum, 34-34 í hreint út sagt ótrúlega dramatískum leik á HM í handbolta í Túnis nú síðdegis. Staðan í hálfleik var 20-14 fyrir Tékka sem náðu svo mest 9 marka forskoti um miðjan síðari hálfleik, 29-20. Þá tóku Íslendingar leikinn í sínar hendur síðustu 15 mínúturnar og skoruðu 14 mörk á móti 5 mörkum Tékkanna. Ólafur Stefánsson var markahæstur Íslands með 11 mörk, þar af 7 úr vítaköstum en hann skoraði jöfnunarmark Íslands úr vítaskoti, 10 sekúndum fyrir leikslok. Guðjón Valur Sigurðsson kom næstur með 8 mörk, Markús Máni Michaelsson 7, Róbert Gunnasson 4/1 úr víti, Alexander Petterson 2, Vignir Svavarsson 1, Arnór Atlason 1 og Einar Hólmgeirsson 1 mark. Næsti leikur er gegn Slóvenum á þriðjudaginn.