75 fm2 snjóhús í Mývatnssveit

"Mývatnssveit er aldrei fallegri en á veturna," segir Yngvi Ragnar Kristjánsson framkvæmdarstjóri hótel Sel í Mývatnssveit. "Í dag var hér 12 stiga frost, logn og sólskin og að mínu mati er ekki til neitt fallegra," segir Yngvi og bætir við að hann líti á Mývatnssveit sem vetrarparadís Íslands og draum þeirra sem vilja leika sér í snjó.

Á hótelinu er mikil þjónusta við ferðamenn í kringum vetrarsport. Þar er hægt að læra að dorga í gegnum vakir, fara í vélsleðaferðir, jeppaferðir upp að Dettifossi, gönguferðir og stunda allskyns ísafþreyingu. "Á ísnum bjóðum við upp á gokart, keilu og golf og svo endum við allt gaman á að fara í snjóhúsið sem var reist í síðustu viku." Í snjóhúsinu, sem er 75 fm2, eru útskorin borð og stólar úr snjó og ís auk Absolut ísbars. Fyrir utan eru svo allskyns snjóskúlptúrar í tenglum við samstarfsverkefnið Snow Magic sem er samvinna Íslands, Finnlands og Svíþjóðar. "Það er ískalt í snjóhúsinu og frábært að fá sér einn kaldan í lok dagsins og skella sér svo í nýja jarðbaðið svo hér er auðveldlega hægt að blanda saman hita og kulda."

Yngvi segir að þar sem lítið hafi fiskast í Mývatni hafi þeir leitað lengra og séu farnir að dorga í Sandvatni og Kringluvatni. "Sandvatn er hér rétt við Mývatnið en Kringluvatn tilheyrir Laxárdal. Þar er samt sama náttúrufegurðin og gaman að sitja þarna og dorga. Svo má ekki gleyma að skoða Dettifoss í vetrarböndum en það er ógleymanleg sjón."

Lestu ítarlegra viðtal í tímaritinu Magasín sem fylgir DV í dag.