Nýr Benz afhjúpaður

"Þessi bíll er sá allra glæsilegasti sem Daimler Chrysler hefur framleitt," segir Hjörtur Jónsson sölustjóri hjá Master, en í gær var nýr Mercedes Benz CLS 500 Coupé afhjúpaður hjá Master í Glæsibæ. Hallgrímur Gunnarsson, forstjóri Ræsis, var sá sem afhjúpaði bílinn við glæsilega athöfn, en eins og margir muna þá voru samskipti fyrirtækjanna tveggja fremur stirð í upphafi. "Samstarf okkar er mjög gott í dag og sér Ræsir um öll okkar þjónustumál. Þetta sýnir bara að menn geta auðveldlega unnið saman og það er það sem við erum að gera," segir Hjörtur. Frumsýninguna á bílnum vann Master í góðu samstarfi við Ræsi en bíllinn var heimsfrumsýndur í Stuttgart í lok september. "Það sýnir bara hversu snemma við erum í því að frumsýna bílinn hérna heima," segir Hjörtur og bætir við að bíllinn sé augnayndi hvers bílaáhugamanns og á varla orð yfir að lýsa glæsileikanum og íburðinum. Bílinn er hægt að fá með öllum hugsanlegum aukabúnaði og kostar í kringum níu milljónir og uppúr, alveg eftir því hverju er bætt við. Honum fylgir mikill lúxus eins og er hann jafnvel útbúinn með sjónvarpi og dvd-spilara. "Vegna þess að hann er fjögurra dyra hafa menn sett spurningarmerki við að hann sé nefndur Coupé, en það er orð notað yfir sportbíla sem eru yfirleitt tveggja dyra og tveggja sæta. Hinsvegar er hann fjögurra sæta þannig að hann fellur undir skilgreininguna," segir Hjörtur og telur að ekki sé hægt að finna flottari sportbíl.