Með réttarstöðu grunaðs manns

Ungur maður hefur fengið réttarstöðu grunaðs manns vegna lögreglurannsóknar á eldsvoðanum á Sauðárkróki á laugardag þar sem einn maður fórst. Hann er talinn hafa verið í húsinu þegar eldurinn kom upp og var sótugur á vettvangi þegar lögregla kom að, en ber við minnisleysi vegna ölvunar. Morgunblaðið hefur það eftir yfirlögregluþjóni á Sauðárkróki að á þessu stigi sé maðurinn ekki grunaður um að hafa vísvitandi kveikt í og að engu hafi heldur verið slegið föstu um hvort um íkveikju hafi verið að ræða. Manninum var sleppt að yfirheyrslum loknum en rannsókn heldur áfram.