Engin aukastörf

Kennarar Grunnskólans í Borgarnesi hafa ákveðið að mæta til vinnu í dag eins og þeir höfðu verið beðnir um þó að umræddur dagur sé frídagur samkvæmt skóladagatali. Þeir hafna hins vegar allri málaleitan skólastjórnenda um aukið vinnuframlag og munu ekki taka að sér nein aukastörf meðan kjör þeirra eru óráðin. Í ályktun frá kennurunum segir að þeir hafni allri samvinnu við Borgarbyggð umfram það sem felst í ráðningarsamningi "á meðan refsivöndur ríkisvaldsins og launanefndar sveitarfélaganna vofir yfir." Kennararnir skora á félaga sína að hugleiða alvarlega með hvaða hætti þeir taki þátt í samstarfi við sveitarfélögin um að bæta nemendum tíma sem forgörðum hefur farið í verkfallinu.