Kennarar í verkfalli í námsferð

Kennarar Ingunnarskóla leggja næsta föstudag í sex daga námsferð til Bandaríkjanna þrátt fyrir kennaraverkfall. Þeir segjast hafa blessun Kennarasambandsins til fararinnar. Að sögn stjórnenda skólans hefur undurbúningur fararinnar staðið í meira en eitt ár og ekki hægt að hætta við hana. Nokkur kurr er meðal foreldra vegna þessa. Ætlun kennaranna er að kynna sér skólastarf í Minneapolis samkvæmt því er fram kemur á heimasíðu skólans. Alls fara þrjátíu og fimm í ferðina: skólastjórar, kennarar, skólaliðar, stuðningsfulltrúar, umsjónarmaður, hjúkrunarfræðingar, sálfræðingur og sérfræðingur svo. Guðlaug Sturlaugsdóttir skólastjóri gat ekki veitt fréttastofu viðtal í dag vegna anna en hún sagði þetta ekki auðvelda ákvörðun. Hins vegar væri ekki annað hægt en að fara í ferðina, ellegar tapa stórum upphæðum sem lagðar hafa verið í undirbúning og flugfargjöld sem ekki fást endurgreidd. Foreldrar sem fréttastofa hefur rætt við segja þetta skjóta skökku við. Um sé að ræða vinnuferð í miðju verkfalli. Kennarar veiti fáar undanþágur í kennaraverkfalli nema þá þegar þeir sjálfir þurfi að fara til útlanda. Samkvæmt dagskrá Ingunnarskóla verða heimsóttir minnst átta skólar en laugardagurinn næsti og sunnudagurinn eru frjálsir.