Ný 1 lína frá BMW

Nýja 1 línan frá BMW verður frumsýnd hjá B&L um helgina. Nýja 1 línan er fyrsti fimm dyra bíllinn frá BMW en hingað til hafa þeir eingöngu verið með fjögurra dyra útgáfur í hönnun sinni. Þetta er þó ekki eina nýjungin sem BMW boðar með 1 línunni. Til að undirstrika markhópinn, ungt fólk á aldrinum 20 til 35 ára, er bíllinn með tengi fyrir iPod, litla MP3 spilarann frá Apple sem nýtur mikilla vinsælda. Tengið er enn fremur hægt að nýta fyrir fartölvur og aðrar gerðir af MP3 spilurum. Þá kemur línan með margvíslegum búnaði sem ekki hefur sést áður í flokki smærri 5 dyra fjölskyldubíla. Má þar nefna DSC stöðugleikastýringuna sem er með spólvörn og run-flat öryggisdekkjum, en á þeim er hægt að keyra allt að 250 km þótt springi, auk þess sem þau koma í veg fyrir að ökumaður missi stjórn á bílnum ef hvellspringur. Verð á nýju BMW 1 línunni er frá 2.490.000 kr.