Í eilífðarbrasi með bílinn

"Bíllinn minn er Honda Civic ´92 og gengur helst aldrei nema hálfan snúning. Þetta er eilífðarbras," segir Ólafur Kristján Guðmundsson, söngvari hljómsveitarinnar Hoffman. "Valið stóð á milli þess að kaupa fjallahjól eða þennan bíl, sem ég fékk fyrir slikk enda orðinn gamall og lasinn. Ég var búinn að láta hann renna í gang í marga mánuði þegar einhver benti mér á að láta athuga geyminn. Nú er kominn nýr geymir og bíllinn hrekkur alltaf í gang en það er samt endalaust eitthvað að." Ólafur segist ekki eiga sér neinn draumabíl enda hafi hann ekkert vit á bílum. Hins vegar langar hann að eiga þyrlu. "Ég var að vafra á netinu og rakst þar á draumaþyrluna, Bell 407 Corporate með öllum græjum. Það er tækið sem mig vantar. Þá kæmist ég alltaf til Eyja og gæti skroppið á tónleika hvert sem er og hvenær sem er," segir Ólafur. Ólafur er sumsé Eyjastrákur og það eru líka hinir meðlimir hljómsveitarinnar Hoffman. Hann vill samt ekkert vera að undirstrika það. "Við erum allir fluttir upp á land og erum að spila á fullu. Svo er platan okkar Bad Seeds að koma út. Eyjar eru fínn staður bara ekki í þessum bransa. Þetta er svona næs ömmu- og afa-pleis."