Söluhæsti BMW bíllinn frá upphafi

Þrátt fyrir að BMW þrjú línan sé komin á sjöunda framleiðsluár er hún enn að seljast í Evrópu í svipuðu magni og á síðasta ári og er orðin söluhæsti bíll BMW frá upphafi. Sígild og sterk hönnun, góð tækni og frábærir aksturseiginleikar er meðal þess sem Helga Guðrún Jónasdóttir, kynningastjóri hjá B&L, telur skýra vinsældir bílsins. "Menn halda tryggð við BMW þegar þeir hafa kynnst honum, sem er alls ekkert skrítið miðað við alla þá kosti sem bíllinn hefur. Þar að auki er hann góður í endursölu því hann heldur verðgildi sínu mun betur en aðrir bílar á markaðnum," segir hún. Næsta vor er væntanleg á markaðinn ný þrjú lína BMW-bílsins.