Fimm stjörnur í árekstrarprófi

Renault-sportbíllinn Megane Coupé-Cabriolet hefur hlotið 5 stjörnur í árekstrarprófun Euro NCAP. Bíllinn hlaut 33,56 stig af 37 mögulegum og þar með er bíllinn sá öruggasti í sínum flokki. Þetta er sjötti bíllinn frá Renault sem fær þessa afburðaeinkunn fyrir öryggisbúnað. "Opnir bílar hafa hingað til ekki þótt endurspegla mikið öryggi, hvorki hvað varðar árekstra eða bílveltur," segir Helga Guðrún Jónasdóttir, kynningarfulltrúi B&L. "En samkvæmt þessum niðurstöðum Euro NCAP veitir Megane Cabriolet-sportbíllinn frábæra vörn í báðum tilvikum. Það er meðal annars vegna þess að framrúðan myndar ásamt veltistöngum að aftanverðu sérhannaðan öryggisbúnað í veltum á meðan hönnun boddísins felur í sér öfluga árekstravörn. Þá má benda á að eins og hjá öðrum meðlimum Megane II-fjölskyldunnar er öryggisbúnaður farþega og bílstjóra með því besta sem völ er á. Sem dæmi má nefna sex loftpúða auk skriðpúða í framsætum á þriggja dyra útgáfum og 3 punkta öryggisbelti í öllum sætum." Þetta er sjötti bíllinn frá Renault sem hin óháða eftirlitsstofnun Euro NCAP veitir fullt hús stiga eða fimm stjörnur fyrir öryggisbúnað.