Ætla að hrista Skólavörðustíginn

"Anjelica Smith er verndari gallerísins og gefur þessu ákveðinn gæðastimpil," segir Valgarður Bragason, einn þriggja stofnenda nýs gallerís við neðanverðan Skólavörðustíg. "Hún er reyndar ekki til, en í teoríunni er hún góða stelpan sem vill skreyta heiminn, gera hann fallegan og góðan. Hún er hálfgerð Pollýanna." Þótt Anjelica Smith sé ekki til heitir nýja galleríið Passion Gallery Anjelicu Smith. Að því standa þrír ungir myndlistarmenn, þau Valgarður Bragason, Hulda Vilhjálmsdóttir og Karen Ósk Sigurðardóttir. Til sýnis hafa þau stillt upp verkum eftir sjálfa sig. "Við erum að sýna málverk og litla skúlptúra og þetta er mikið fígúratívt hjá okkur öllum," segir Valgarður og bæti því við að þau séu öll miklir rómantíkerar. "Svo verða líka gjörningar í sumar og alls konar uppákomur. Við ætlum að taka Skólavörðustíginn og hrista hann aðeins, rugla aðeins í honum."