Ís­lendingaliðið vann bikarinn með tvo ólög­lega

„Þetta er auðvitað óheppilegt. Við viljum auðvitað fylgja reglunum,“ segir Johan Jepson, formaður IFK Kristianstad, í samtali við Aftonbladet sem greindi fyrst frá málinu.

Kristianstad hefur lengi haft sterka tengingu við Ísland og átti Einar Bragi Aðalsteinsson til að mynda sinn þátt í því að liðið varð bikarmeistari á síðustu leiktíð, sem og Svíþjóðarmeistari.

Bikarmeistaratitilinn vann liðið hins vegar þrátt fyrir brot á reglum keppninnar, samkvæmt Aftonbladet.

Þeir Albin Selin og Isaac Biel Nilsen voru nefnilega ekki skráðir í IFK Kristianstad heldur í venslaliðið IF Kristianstad sem spilar í næstefstu deild. Það virðast þeir raunar hafa verið allan sinn feril.

Þetta veldur ekki vandræðum í deildarkeppni eða Evrópukeppni en frá og með síðustu leiktíð eru reglurnar hins vegar skýrar hvað þetta varðar í bikarkeppninni. Þar segir að leikmenn verði að vera skráðir nákvæmlega í það lið sem þeir spila fyrir og megi ekki spila fyrir annað lið í keppninni.

Mótastjóri sænska handknattleikssambandsins staðfestir að þetta þýði að þeir Selin og Biel Nilsen hefðu ekki átt að fá að spila með IFK Kristianstad í bikarleikjunum á síðustu leiktíð, né á þessari leiktíð.

Hins vegar hefðu mótherjar liðsins þurft að gera athugasemd innan við sólarhring eftir hvern leik til þess að eitthvað yrði gert í málinu. Kristianstad verður því ekki svipt bikarmeistaratitlinum og liðið er klárt í undanúrslitin í yfirstandandi keppni. Nú hafa leikmennirnir tveir auk þess verið rétt skráðir, í IFK Kristianstad.

„Ég hafði ekki hugmynd um þetta. Eins og ég skildi það þá var þetta í lagi vegna samstarfssamningsins,“ sagði Jepson formaður félagsins og bætti við:

„Auðvitað er þetta óheppilegt, við viljum að sjálfsögðu fylgja reglunum. Svo finnst mér að það hefði verið verra ef þeir hefðu verið skráðir eftir öllum kúnstarinnar reglum í „röngu“ félagi, segjum Alingsås. En nú voru þeir þó skráðir í „okkar“ félag í þessu samhengi og báðir eru uppaldir í IFK Kristianstad. Mér getur ekki fundist þetta vera neitt stórhneyksli þótt það sé auðvitað klaufalegt.“

Þrír Íslendingar bættust í leikmannahóp Kristianstad í sumar og eru allir rétt skráðir, en það eru hinir ungu Andri Erlingsson og Baldur Fritz Bjarnason, og Ólafur Guðmundsson sem tók fram skóna að nýju og spilar fyrir sitt gamla félag.