Einar Bragi sleginn í punginn en svaraði vel fyrir sig

Kristianstad var 2-0 undir í einvíginu en er búið að jafna metin í 2-2 með þessum sigri.

Líkt og fyrsti leikur einvígisins fór þessi leikur í framlengingu, en ólíkt fyrsta leiknum tókst Kristianstad að vinna í kvöld.

Einvígið mun ráðast í oddaleiknum á föstudag.

Einar Bragi átti frábæran leik fyrir Kristianstad og skoraði sjö mörk, þar af þrjú mörk á mikilvægum tímapunkti í framlengingunni. Axel Mansson var markahæstur með 13 mörk fyrir Kristianstad.

Mesta athygli vakti þó þegar Samuel Lindberg, leikmaður AHK, sló Einar Braga í punginn.

Lindberg klúðraði vítakasti og Einar Bragi virtist vera eitthvað að stríða honum fyrir það þegar Lindberg sló frá sér.

„Þetta var ekki fallegt. Þetta leit mjög viljandi út,“ sagði í sjónvarpslýsingu leiksins.

Dómararnir sáu hins vegar ekki hvað gerðist og leikurinn hélt áfram.

Sænski ríkismiðillinn SVT birti myndband af atvikinu en það er læst utan Svíþjóðar.