Lauf­ey lifnar við í Fortnite Festival

Fortnite Festival er eins konar hliðarleikur hins geysivinsæla Fortnite og er gjörólíkur að því leyti að hann gengur út á flytja lög tónlistarmann, ekki ósvipað Guitar Hero og Rock Band.

Leikurinn skiptist í tímabil tileinkuð heimsfrægum tónlistarmönnum. Það fjórtánda hefst á morgun og er tileinkað íslensku söngkonunni Laufeyju Lín Jónsdóttur. Hún bætist þar í hóp með tónlistarmönnum á borð við Chappell Roan, Sabrinu Carpenter og Snoop Dogg. Stiklu fyrir tímabilið má sjá hér að neðan:

Fyrir utan það að geta spilað lög tónlistarkonunnar Laufeyjar geta spilarar brugðið sér í gervi hennar. Tvö Laufeyjar-skinn verða þar í boði, annars vegar þar sem Laufey er í hvítum kjól og hins vegar þar sem hún er í svörtum kjól líkt og í laginu „Lover Girl“. 

Þar að auki verður hægt að kaupa gítar Laufeyjar í leiknum, kanínuna Mei Mei og ýmsa aukahluti tengda henni.

Laufey hefur farið sigurför um heiminn síðustu ár og er búin að ferðast um Bandaríkin og Evrópu síðustu mánuði. 

Í byrjun vikunnar gaf hún svo út tónlistarmyndband við lagið „Madwoman“ með stórleikaranum Hudson Williams, skautastjörnunni Alysu Liu og fleiri góðum. Það lag auk „Lover Girl“ og „Tough Luck“ verða sömuleiðis í leiknum.

Þetta er ekki fyrsta samstarf Laufeyjar við Fortnite því í fyrra var notendum leiksins gert mögulegt að kaupa dansspor hennar. Danssporin eru eitt aðalsmerki leiksins og bættist Laufey í góðan hóp tónlistarmanna.