„Þetta er marg­fræg klisja“

Þrátt fyrir að FH-ingar hafi unnið með sex mörkum var sigur þeirra alls ekki öruggur. Liðið var undir stóran hluta leiksins og sigldi ekki fram úr fyrr en undir lokin.

„Við vorum að mæta bara ofboðslega góðu Haukaliði og við héldum haus alveg til enda. Þess vegna endaði þetta svona, en þetta var hörkuleikur tveggja frábærra liða og eins týpískur Hafnarfjarðarslagur og hann verður.“

Eins og áður segir voru FH-ingar að elta stóran hluta leiksins og lengi vel leit út fyrir að liðið myndi ekki ná að taka skrefið og komast í forystu.

„Við vorum líka bara undirbúnir undir það að það eru sveiflur í þessum leikjum og við þurfum að halda fókus á okkar vinnu. Halda áfram að treysta á það sem við erum að gera og mér fannst við gera það.“

„Við vorum með of marga tapaða bolta í fyrri hálfleik og fórum aðeins yfir það í hálfleik. Við breyttum aðeins vörninni og það gekk vel í seinni hálfleik. Við höldum þeim í 21 marki, enda voru vörn og markvarsla frábær í seinni hálfleik.“

En á gamla góða klisjan „sókn vinnur leiki en vörn vinnur titla“ við hjá FH-ingum.

„Já þetta er margfræg klisja, en auðvitað er þetta bara rétt. Þú þarft að spila alvöru vörn ef þú ætlar að ná einhverjum árangri og vörn FH-liðsins hefur verið mjög góð í vetur. Við gerum okkur grein fyrir því að þetta er einn af okkar styrkleikum. Þetta verður að vera til staðar.“

Að lokum var Sigursteinn með nokkuð einfalda uppskrift að því hvað FH-ingar þurfa að gera til að halda góðu gengi áfram á föstudaginn.

„Við þurfum bara að vera duglegir að halda áfram að undirbúa okkur, gagnrýnir á sjálfa okkur og halda í þessa vinnusemi og þennan anda sem við erum að ná fram með fólkinu okkar,“ sagði Sigursteinn að lokum.