„Þeir refsa fyrir öll mis­tök og þeir refsuðu vel í dag“

„Við vorum ekkert almennilega í þessum leik og erum að fara með mikið af dauðafærum og glötuðum boltum sem er auðvitað rándýrt á móti liði eins og Val. Þeir refsa fyrir öll mistök og þeir refsuðu vel í dag,“ sagði Andri Snær um spilamennsku sinna manna og hélt áfram.

„Þetta var skrítið. Við byrjuðum leikinn varnarlega að mörgu leyti mjög vel, en þetta lá í sóknarleiknum. Við vorum bara afleitir þar og við vorum að reyna að finna lausnirnar saman og til að byrja með var flæðið ekki gott, en svo fáum við stöðurnar sem við vildum en við vorum bara að brenna. Björgvin var að verja eins og brjálæðingur, ég hef ekki séð hann svona góðan í mörg ár held ég. Valsmenn bara hlupu yfir okkur í dag.“

Staðan í hálfleik var 17-9 fyrir Val og tókst heimamönnum að skora fyrstu þrjú mörk síðari hálfleiksins. Við það virtust leikmenn KA algjörlega gefast upp. Aðspurður út í þá uppgjöf hafði Andri Snær þetta að segja.

„Ég er ósáttur við það að við fórum svona mikið niður á hælanna. Það var rosalega mikil tími eftir í seinni hálfleik og við áttum einfaldlega að gera betur. Þá jókst munurinn ansi hratt áfram og ég er ósáttur við það.“

En hvað þarf Andri Snær og KA-liðið hans að laga fyrir næsta leik einvígisins?

„Við ætlum ekki að fara að mikla þetta mikið fyrir okkur, stundum er þetta svona í úrslitakeppninni og við bara hittum alls ekki á þetta í dag á meðan Valsmenn voru svo sannarlega á deginum sínum. Við þurfum bara að laga spennustigið okkar, fyrst og fremst, og mæta með sjálfstraustið í lagi í okkar sóknarleik. Það er það sem ég horfi í núna,“ sagði Andri Snær að lokum.