Harm­leikur á hand­bolta­leik

Heimamenn í Flensburg unnu leikinn 40-35 en samkvæmt þýska miðlinum Bild var þó dauf stemning á leiknum mestallan tímann, þó að 5.000 áhorfendur væru í höllinni.

Snemma leiks kom nefnilega í ljós að eitthvað alvarlegt hefði gerst á áhorfendapöllunum og eftir það var ekki spiluð nein tónlist í hátalarakerfinu, líkt og venja er á handboltaleikjum.

„Fyrir þá sem eru að velta fyrir sér þögninni í höllinni, það er engin tónlist núna og ekkert í gangi í hátalarakerfinu, þá var ég að fá að vita að það hefði orðið hér neyðartilvik. Þess vegna er allri tónlist sleppt núna. Ég veit ekki nákvæmlega hvað gerðist en við krossum fingur og vonum að það sé ekkert alvarlegt,“ sagði Markus Götz sem lýsti leiknum.

Það sem eftir var af fyrri hálfleik heyrðist aðeins klapp í áhorfendum en leikurinn hélt áfram og leikmenn urðu að spila þrátt fyrir óvissuna sem ríkti.

Þannig hélt leikurinn svo áfram í seinni hálfleik en að leik loknum var svo greint frá því að áhorfandi hefði látist.

„Það er með mikilli sorg sem við tilkynnum að læknisfræðilegt neyðartilvik kom upp í EHF-heimaleik okkar gegn Montpellier. Því miður báru þær aðgerðir sem gripið var til ekki árangur,“ sagði í tilkynningu frá Flensburg.

„Hugur okkar er hjá aðstandendum og vinum hins látna á þessum erfiðu tímum. Handboltinn og allt sem viðkemur íþróttum skiptir engu máli í dag,“ sagði framkvæmdastjórinn Holger Glandorf.

Eins og fyrr segir vann Flensburg leikinn, rétt eins og þegar liðin mættust í úrslitaleik Evrópudeildarinnar á síðasta ári.

Flensburg er nú með sex stig eftir fjóra leiki, tveimur á eftir Kiel sem er efst í riðlinum. Montpellier er með tvö stig en Bidasoa neðst án stiga. Efsta liðið fer í 8-liða úrslit en liðin í 2.-3. sæti fara í umspil.