Þórsarar upp úr fallsæti

Þórsarar eru nú komnir með ellefu stig, jafn mörg og Selfyssingar. Liðin eru í 9. og 10. sæti deildarinnar en liðin sem enda þar falla hvorki né komast í úrslitakeppnina. 

Aðeins eitt stig skilur Þórsara og Selfyssinga og HK-inga, sem eru í 8. sætinu, að. Stjörnumenn eru í 11. sætinu með níu stig og ÍR-ingar á botninum með sjö stig. Öll liðin eiga eftir að leika fjóra leiki í deildarkeppninni.

Hafþór Már Vignisson skoraði níu mörk fyrir Þór í dag, Oddur Gretarsson sjö og Brynjar Hólm Grétarsson sex.

Leikurinn í dag var jafn en Þórsarar voru jafnan fetinu framar. Staðan í hálfleik var 17-17.

Hannes Höskuldsson minnkaði muninn í 26-27 fyrir Selfoss um miðjan seinni hálfleik en Þór skoraði þrjú af næstu fjórum mörkum og náði þriggja marka forskoti, 27-30, fyrir lokakaflann.

Þar héldu gestirnir frá Akureyri vel á spöðunum og lönduðu tveggja marka sigri, 33-35.

Hannes skoraði ellefu mörk fyrir Selfoss, þar af sjö úr vítaköstum, og var markahæstur á vellinum. Selfyssingar hafa tapað fimm af síðustu sex deildarleikjum sínum.

Þórsarar, sem hafa unnið tvo af síðustu fjórum leikjum sínum, taka á móti Haukum í næstu umferð Olís-deildarinnar, 4. mars. Daginn eftir mætir Selfoss HK í Kórnum.