KA-menn með sjöunda heimasigurinn í níu leikjum

KA vann fimm marka sigur á Fram, 32-27, og hefur þar með náð í flest stig á heimavelli af öllum liðum deildarinnar, sjö sigra í níu leikjum.

KA er í fimmta sætinu með 22 stig en einu stigi á eftir þeim eru Eyjamenn sem unnu Hauka í dag. Bæði lið hafa unnið þrjá deildarleiki í röð og stefna ofar í töflunni.

Bjarni Ófeigur Valdimarsson skoraði átta mörk og gaf sjö stoðsendingar fyrir KA og þeir Morten Linder og Logi Gautason skoruðu fimm mörk hvor. Ágúst Elí Björgvinsson varði mjög vel í markinu með sautján skot.

Dánjal Ragnarsson var markahæstur hjá Fram með átta mörk og Viktor Sigurðsson skoraði fimm mörk.

Selfoss endaði þriggja leikja taphrinu sína með 27-26 útisigri á Stjörnunni í Mýrinni.

Tryggvi Sigurberg Traustason skoraði sjö mörk fyrir Selfoss og þeir Hannes Höskuldsson og Sölvi Svavarsson voru með sex mörk hvor. Daníel Karl Gunnarsson og Hans Jörgen Ólafsson skoruðu sex mörk hvor fyrir Stjörnuna.