„Hann er örugg­lega góður pabbi“

„Ég er bara ágætur. Auðvitað var maður svekktur eftir leik. Nú er bara undirbúningur hafinn fyrir Svíana og er bara spenntur,“ sagði Janus Daði fyrir æfingu landsliðsins í gær eftir tap fyrir Króötum degi fyrr.

„Það er ákveðinn lærdómur sem við getum dregið af þessu og svo bara höldum við áfram,“ segir Janus um leikinn við Króata. Hvaða lærdóm má þá draga?

„Að spila betri vörn og fá á okkur færri mörk. Það eru nokkrir puntkar hér og þar sem þarf að stilla til. Þá hef ég fulla trú á þessu,“ segir Janus.

Svíþjóð spili allt öðruvísi leik en Króatarnir sem hægðu á leiknum við Ísland. Svíar geri þveröfugt.

„Þetta er leikur á allt öðru tempoi. Svíarnir hlaupa eins og brjálæðingar. Þeir spila hraðar og skandinavískt yfirbragð. Ég myndi segja að þetta sé tvennt ólíkt,“ segir Janus. Hentar það Íslandi betur?

„Já, ég held það. Við teljum að það henti okkur vel. Við tökum slaginn og ætlum að gera þetta betur en þeir,“ segir Janus.

Janus deilir leikstjórnandastöðunni hjá Pick Szeged í Ungverjalandi með Jim Gottfridsson, sem gekk í raðir félagsins í sumar. Gottfridsson hefur verið burðarás í liði Svía undanfarin ár en hlutverk hans minna á mótinu í ár vegna góðrar spilamennsku Felix Claar sem stýrir leik Svíanna.

„Hann er fínn. Svíar eru með tvo góða menn í öllum stöðum og sá sem deilir stöðu með honum er að spila mjög vel og þá eru minni mínútur á hann,“ segir Janus um Gottfridsson. Hvernig týpa er sá sænski?

„Ég er búinn að vera með honum í liði í hálft ár. Hann er fínn liðsmaður og örugglega góður pabbi og eitthvað, þú veist,“ segir Janus léttur.

En hver er lykillinn að sigri?

„Geggjuð vörn, að keyra á hraðaupphlaup og passa upp á boltann.“

Viðtalið má sjá í spilaranum.