„Hef verið í handbolta í þúsund ár en hef aldrei séð neitt þessu líkt“

Ingvi Þór Sæmundsson skrifar 18. janúar 2026 11:01

Alfreð Gíslasyni varð á í messunni undir lok leiks Þýskalands og Serbíu á Evrópumótinu í handbolta. getty/Sina Schuldt

Sérfræðingar TV 2 í Danmörku voru gáttaðir á atvikinu undir lok leiks Þýskalands og Serbíu á EM í handbolta í gær. Alfreð Gíslason, þjálfari Þýskalands, tók leikhlé rétt áður en Þjóðverjar skoruðu og markið var dæmt af. Serbar enduðu á því að vinna leikinn, 30-27, og skildu Þjóðverja eftir í erfiðri stöðu í A-riðli.

Þegar tæpar þrjár mínútur voru eftir af leiknum í Herning í Danmörku í gær skoraði Juri Knorr og jafnaði í 26-26. Það hélt hann allavega en eftir að dómararnir höfðu kíkt á atvikið á myndbandi var markið dæmt af þar sem Alfreð tók leikhlé nokkrum sekúndubrotum áður en boltinn endaði í netinu.

Eftir leikhléið tapaði Miro Schluroff boltanum og Serbar skoruðu í kjölfarið og komust tveimur mörkum yfir, 27-25. Þeir unnu svo leikinn með þriggja marka mun, 30-27.

Eftir leikinn gekkst Alfreð við því að hafa gert mistök þegar hann tók leikhléið.

„Ég vildi taka leikhlé á meðan það væri enn fullur kraftur í okkur. Því miður ýtti ég nokkrum sekúndubrotum of snemma á leikhléstakkann. Það er algjörlega mín sök,“ sagði Alfreð í viðtali við ARD eftir leik.

Knorr, sem skoraði markið sem var dæmt af, var ekki sáttur í leikslok og þýskir fjölmiðlar telja að hann hafi skotið á Alfreð í viðtölum eftir leikinn.

Kasper Hvidt og Claus Møller Jakobsen, sem fjölluðu um leikinn fyrir TV 2, skildu ekki hvað Alfreð gekk til á þessu örlagaríka augnabliki.

„Hvernig getur Gíslason ekki fylgst með eigin sókn og séð að leikmaðurinn er að fá opið færi? Hann hlýtur að langa að skalla gólfið. Ég hef verið í handbolta í þúsund ár en hef aldrei séð neitt þessu líkt,“ sagði gamli markvörðurinn Hvidt.

Jakobsen sagði að Alfreð hefði ekki fylgst nógu vel með því sem var að gerast inni á vellinum.

„Alfreð var ekki með á nótunum á lokamínútunum. Hann hafði enga yfirsýn yfir það sem var að gerast á vellinum. Af hverju stendur hann og horfir upp á stigatöfluna í stað þess að fylgjast með því sem er að gerast inni á vellinum?“ sagði Jakobsen gáttaður.

Til að komast áfram í milliriðla þarf Þýskaland að vinna Spán á morgun auk þess að treysta á að Austurríki taki stig af Serbíu. Spánverjar eru á toppi A-riðils með fjögur stig, Serbar og Þjóðverjar eru með tvö stig en vegna sigursins í gær er serbneska liðið fyrir ofan það þýska. Austurríkismenn reka svo lestina í A-riðli en þeir eru án stiga.

EM karla í handbolta 2026

Mest lesið

Fleiri fréttir