Mega hand­velja lið utan Evrópu inn í Meistara­deildina

Þetta er hluti þess sem samþykkt var eftir fund framkvæmdastjórnar EHF í Rotterdam um helgina, í tengslum við úrslit HM kvenna sem þar fóru fram.

Ákveðið var að tíu efstu handknattleikssamböndin á styrkleikalista EHF fengju hvert um sig eitt öruggt sæti í nýju Meistaradeildinni, sem hefst tímabilið 2026-27. Röðun á listanum byggir á árangri tímabilin þrjú á árunum 2022-25. Löndin eru Þýskaland, Spánn, Frakkland, Danmörk, Pólland, Ungverjaland, Rúmenía, Portúgal, Króatía og Noregur.

Þá geta að hámarki átta þessara þjóða fengið aukasæti, og fjórar þjóðir sem ekki eiga fast sæti.

EHF áskilur sér svo rétt til að bæta við liðum eftir eigin geðþótta, þar á meðal liðum utan Evrópu.

Í nýju Meistaradeildinni verða 24 lið, í stað 16 áður, og munu þau byrja á að spila í sex fjögurra liða riðlum.

Efstu tvö lið úr hverjum riðli komast svo áfram í aðalhluta Meistaradeildarinnar, þar sem spilað verður í tveimur sex liða riðlum. Efstu fjögur lið úr hvorum riðli komast svo áfram í 8-liða úrslit og keppninni lýkur sem fyrr með fjögurra liða úrslitaveislu í Köln.

Tvö pláss fyrir Ísland í Evrópudeildinni

Hætt verður með undankeppni í Evrópudeildinni og munu þess í stað 32 lið hefja leik í átta fjögurra liða riðlum. Ísland á rétt á tveimur sætum.

Tvö lið komast áfram úr hverjum riðli í útsláttarkeppni en þangað koma líka liðin tólf sem enduðu í 3. eða 4. sæti í fyrri riðlakeppni Meistaradeildarinnar.

Alls hefja því 28 lið leik í útsláttarkeppninni, þar sem leikið verður heima og að heiman, og komast 14 sigurlið áfram í 16-liða úrslit. Við þau bætast svo liðin tvö sem enda í 5. sæti í seinni riðlakeppni Meistaradeildarinnar.