„Við vorum búnir að grafa okkur í djúpa holu“

„Frábær karakter að koma til baka, við vorum búnir að grafa okkur í djúpa holu. Ánægður með okkur að gera þetta að leik í lokin. Við hefðum jafnvel getað stolið stigi, við vorum að klikka á skotum yfir völlinn á opið mark. Þegar talið er upp úr pokanum þá eru klaufaleg augnablik hjá okkur sem fer með þennan leik,“ sagði Einar eftir leikinn.

Eins og Einar benti á þá voru Framarar ekki langt frá því að stela stigi eftir flottan lokakafla en segir að liðið hafi einfaldlega misst Hafnfirðinga of langt frá sér í kjölfar slæms kafla í upphafi seinni hálfleiks.

„Mér fannst vörnin loksins góð en hefur hún hefur ekki verið góð í langan tíma og margt jákvætt sem ég get tekið út úr þessu. Það vantaði pínu gæði og reynslu á köflum. Við misstum FH-ingana of langt fram úr okkur í seinni hálfleik.“

„Mér fannst sóknarleikurinn fínn í fyrri hálfleik. Við skorum 14 mörk og förum með 5-6 dauðafæri. Sérstaklega fyrstu 20 mínúturnar í seinni hálfleik, þá vorum við í basli og ég átti alveg átti von á því þar sem við erum að spila rosa mikið á sömu mönnunum. Það mæðir mikið á Viktori [Sigurðssyni] og Dánjal [Ragnarssyni] og þeir voru orðnir kannski smá bensínlausir og vantaði smá orku í seinni hálfleik,“ sagði Einar.

Tveir leikir sem svíða

Íslands- og bikarmeistarar Fram hafa ekki náð sama takti og í fyrra það sem af er tímabili og sitja nú í 8. sæti með 10 stig. Einar er þó bjartsýnn á framhaldið og segir að það séu fyrst og fremst tveir leikir sem hann sé ósáttur með hingað til.

„Það eru tveir leikir sem svíða mjög sárt en það er Selfoss úti og Stjarnan heima í síðustu umferð. Það voru lélegir leikir af okkar hálfu, þar fyrir utan hefur þetta verið fínt og margt mjög jákvætt.“

Meiðslalistinn hjá Fram er langur um þessar mundir en þar má finna leikmenn á borð við Marel Baldvinsson, Rúnar Kárason, Þorstein Gauta Hjálmarsson og Magnús Öder Einarsson. Einar segir að það hafi skiljanlega áhrif.

„Það eru margir leikmenn búnir að spila mikið og við erum búnir að reyna nýta fyrri hlutann ágætlega en við erum með fullt af mönnum óleikfærum. Við græðum á þessu þegar fram líða stundir en enginn spurning, maður hefði viljað vera ofar. Það eru þó fyrst og fremst tveir leikir sem sitja í mér sem þetta varðar,“ sagði þjálfarinn að lokum.