„Þetta lítur verr út en þetta var“

Gunnar segir að hann eigi margar góðar minningar úr Mosfellsbænum en leikurinn í dag er vissulega ekki ein af þeim.

„Þetta er sjaldgæf minning, ég skal bara viðurkenna það. Leikurinn var auðvitað gríðarleg vonbrigði og ekki í takt við okkar spilamennsku síðustu vikur. Auðvitað lítur samt allt illa út þegar þú ert með mann hinu megin sem hreinlega tekur allt úr þér. Þannig að þetta lítur verr út en þetta var. Hann tók okkur og jarðaði okkur algjörlega í markinu,“ sagði Gunnar Magnússon.

Kemur einhver hræðsla yfir okkur

Lið Hauka gjörsamlega brotnaði um miðbik fyrri hálfleiksins og sá í raun aldrei til sólar það sem eftir var af leiknum. Gunnar segir að sóknarlega hafi liðið spilað fínt en farið illa með mörg dauðafæri sem hafi dregið verulega úr liðinu. Þá vill hann meina að varnarlega hafi liðið ekki sýnt sitt rétta andlit allan leikinn.

„Það molnar undan okkur hægt og rólega. Það kemur einhver hræðsla yfir okkur og við vorum í raun bara mjög ólíkir sjálfum okkur hér í dag. Þá vorum við líka linir varnarlega og ekki neitt nálægt því sem við höfum verið síðustu vikur. Ég þarf að skoða af hverju það gerist. Við erum vissulega með marga tapaða bolta en einnig með sóknarleik til að skora 35 mörk. Við fengum góð færi en þurfum að klára þau líka. Mér fannst við varnarlega vera linir allan tímann, líka í byrjun þegar þetta var jafnt og vanta alla grimmd í okkur allan leikinn. Við reyndum allan fjandann en náðum okkur aldrei neinu almennilegu áhlaupi á þá þar sem við fórum illa með þessi dauðafæri.“

Þrátt fyrir tapið eru Haukar enn á toppnum ásamt Val sem unnu Stjörnuna í kvöld. Gunnar telur að liðið geti enn bætt sig og þurfi að læra af leiknum í kvöld. Bæði hann og liðið sé enn að læra og eigi eftir að koma sterkari til baka eftir þennan leik.

Sjálfur er ég að læra mikið á drengina

„Eins og ég er búinn að vera að segja þá tel ég okkur eiga enn nóg inni. Það hefur auðvitað gengið ágætlega að safna stigum og við erum á toppnum ásamt Val. Ég er aldrei fullkomlega ánægður og vil meina að við eigum nóg inni. Ég hef mikla trú á þessum drengjum en við höfum lært mikið af þessum tapleikjum og nýtt okkur þá sem lærdóm. Sjálfur er ég að læra mikið á drengina og lærði mikið af þessum leik í kvöld. Þetta er maraþon, í kvöld misstigum við okkur en Afturelding var betri en við á öllum sviðum og átti sigurinn fullkomlega skilinn. Skaðinn er skeður og það eina sem við getum gert núna er að læra af þessum leik og komið sterkari til baka enn betri.“