„Hrika­lega stoltur af stelpunum“

Valskonur máttu þola þrettán marka tap í fyrri leik liðanna og því var ljóst að verkefni kvöldsins væri erfitt. Valskonur sýndu þó mikinn karakter og náðu í nærandi jafntefli, 22-22.

„Þetta eru auðvitað frábær úrslit og við höfðum meira að segja tækifæri á því að jafnvel að ná sigrinum. En ég er hrikalega stoltur af stelpunum og mér fannst þær gera þetta ótrúlega vel í dag. Þetta er búin að vera erfið vika með mikið af leikjum, en ef við spilum svona þá erum við á mjög góðum stað. Ég var mjög ánægður með svarið sem kom hérna í dag,“ sagði Anton í leikslok.

Valskonur byrjuðu leikinn af krafti, en lentu svo fimm mörkum undir þegar leið á fyrri hálfleikinn. 

„Bara ekki spurning, þetta er mikill karakter. Þetta er frábært lið og vel mannað með mikla breidd. Þær þekkja það að vera í þessari keppni og fóru alla leið í final four í fyrra þannig þetta er ekkert lið sem gefst bara upp. Þær voru mjög góðar í dag, en við vorum það sannarlega líka,“ sagði Anton.

„Ég vildi bara fá góða frammistöðu og heilsteyptan leik og ég fékk það klárlega í dag.“

Þá segir Anton að það sé klárlega stigsmunur á Evrópudeildinni og Evrópubikarnum, sem Valskonur unnu á síðasta tímabili.

„Það er það klárlega. Þetta er eitt af sterkari liðunum sem fór alla leið í fyrra. Þú ert bara komin upp um „level“ í þessari keppni og maður fann það alveg. En mér fannst við mjög flottar í dag. En það er auðvitað bara gaman að spila svona leiki. Þetta er flott lið, þær eru taplausar í deildinni og alltaf gaman að spila svona leiki.“

Að lokum segir Anton að lið eins og Valur tapi aldrei á því að spila leiki sem þennan og máta sig við bestu liðin.

„Ekki spurning. Þetta var bara mjög gott og fer í reynslubankann. Við viljum þetta því þetta er gott fyrir íslenskan kvennahandbolta, landsliðið og fleira, að máta sig við bestu liðin. Þetta er bara mjög jákvætt, en eins og ég segi þá hefði ég viljað fá betri frammistöðu úti, en frammistaðan í dag er hrikalega jákvæð,“ sagði Anton að lokum.