Pat­rekur hættur eftir dapurt gengi Stjörnunnar

Stjörnukonur hafa tapað fyrstu sex leikjum sínum í Olís-deildinni og sitja einar á botni deildarinnar. Í gærkvöld töpuðu þær svo me eins marks mun gegn 1. deildarliði FH, 23-22, í fyrstu umferð Powerade-bikarsins.

Patrekur, sem er 53 ára, er uppalinn Stjörnumaður og fyrrverandi atvinnu- og landsliðsmaður. Hann hóf þjálfaraferil sinn hjá Stjörnunni árið 2008 og hefur síðan þá þjálfað félagslið í Þýskalandi og Danmörku, auk Vals, Hauka og Selfoss en tvö síðastnefndu liðin gerði hann að Íslandsmeisturum. Þá stýrði Patrekur austurríska landsliðinu á árunum 2011-2019.

Frá árinu 2020 hefur Patrekur starfað fyrir Stjörnuna, sem þjálfari karlaliðs félagsins, rekstrarstjóri handknattleiksdeildar og loks sem þjálfari kvennaliðsins frá því í fyrravor.

Í tilkynningu Stjörnunnar segir að mikil uppbygging hafi átt sér stað innan handknattleiksdeildarinnar frá heimkomu Patreks og að hann eigi stóran þátt í henni.