Skilur ekki hvernig var hægt að breyta víti í markmannskast

TTH Holstebro hafði fengið vítakast þegar þrjátíu sekúndur voru eftir af leiknum gegn Fredericia í stöðunni 31-30 fyrir TTH, en eftir myndbandsskoðun breyttu dómararnir dómnum í markmannskast.

Arnór er þjálfari TTH Holstebro og hann skildi lítið í þeirri ákvörðun eftir leikinn sem lauk með jafntefli, 31-31. Heimamenn jöfnuðu metin í 31-31 með marki frá Martin Bisgaard þegar tvær sekúndur voru eftir.

„Við erum vonsviknir. Ég er vonsvikinn yfir því að við fáum ekki einu sinni aukakast. Ég verð að viðurkenna það. Þeir hljóta að halda að þetta sé klárt vítakast, þeir geta ekki haft svo rangt fyrir sér að það sé ekkert dæmt. Þá hlýtur að vera aukakast, en svona er þetta. En það er okkur að kenna að við vinnum ekki,“ sagði Arnór við TV2 Sport.

Það var ekki bara Arnór Atlason þjálfari TTH sem skildi ekki hvernig dómarar leiksins gegn Fredericia gátu breytt vítakasti í markkast. Claus Möller Jakobsen, handboltasérfræðingur TV2 Sport, skilur undrun hans.

„Mín fyrstu viðbrögð eru að það sé umdeilt að vallardómarinn dæmi vítakastið. Hann stendur auðvitað þannig að hann sér allt sem gerist,“ sagði Jakobsen.

„Hann sér að Pevnov [Evgeni] ýtir við honum og það kemur ekkert frá markdómaranum sem venjulega sér um að dæma vítaköst í svona aðstæðum. Mér finnst Arnór hafa rétt fyrir sér. Það má vel vera að þetta sé ekki vítakast, en það er að minnsta kosti aukakast á Thomas Damgaard,“ sagði Jakobsen eftir leikinn.

Holstebro er í sjötta sæti dönsku deildarinar með sjö stig í sjö leikjum. Liðið hefur þó aðeins unnið einn af síðustu fjórum deildarleikjum sínum.