Sann­færð um að hún var Skoti í fyrra lífi

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

Ég vakna nú yfirleitt í kringum sjö, en það þýðir ekki endilega að ég hoppi strax á fætur. 

Á heimilinu búa nefnilega tveir unglingar sem þurfa sinn tíma á eina baðherberginu á heimilinu, þannig að ég ligg oft upp í og hlusta eftir því hvenær komið sé að mér. 

Nýti þá oft tímann í að skoða hvernig dagatalið lítur út og svara stuttum skilaboðum.“

Hvað er það fyrsta sem þú gerir á morgnana?

„Ég nýti tímann á morgnanna í að vinna létt heimilsverk og tryggja að bæði börnin mæti á réttum tíma í skólann. Ég predika oft við börnin mín að best sé að gera það sem þarf að gera fyrst, svo megi gera það sem maður vill gera. Það að taka úr uppþvottavélinni, brjóta saman af snúrunni, ganga frá eftir morgunmat og annað áður en haldið er af stað út í daginn gefur mér heilmikið, af því þá veit ég að ég hef meiri tíma í það sem ég vil gera seinna yfir daginn. 

Eftir að búið er að koma börnunum á sína staði þá er kominn tími á morgun kaffibollann, stundum yfir fyrstu verkefnum dagsins, en það er samt fátt betra en að ná smá spjalli yfir bollanum með vinnufélögum, kollegum eða vinum.“

Ef þú værir hetja í teiknimynd, hver værir þú þá?

„Ég hugsa að ég væri mamma hennar Meridu úr Brave. Það er að hluta til af því hún er sterk og ákveðin, sinnir sínu og vill vera góð fyrirmynd, en líka af því ég elska allt skoskt. 

Ég segi oft í gríni að ég hljóti að hafa verið Skoti í fyrra lífi, svo mikið dáist ég að bæði landi og þjóð. 

Eitt besta ferðalag sem ég hef farið í var til skosku hálandanna með fjölskyldunni þar sem við dvöldum í litlum smábæ sem heitir Grantown-on-Spey, keyrðum um og skoðuðum gamla kastala, hálandanaut og dásamlegu náttúruna allt í kring.“

Í hvaða verkefni ertu að vinna helst í þessa dagana?

„Ég verð að viðurkenna að ég hef verið frekar hugsi síðustu daga um stöðu heimsins og líðan fólks eftir því. Mannauðsfólki er mjög umhugað um að styðja við góða menningu, þar sem fólki líður vel og vill vera. Við viljum ekki að streita og álag í vinnu smitist inn í líf fólks utan vinnu, en í dag upplifi ég sem svo að streita og álag af stöðu heimsins geti smitast inn á vinnustaði. 

Þess vegna hef ég verið að glugga aftur í fræði Amy Edmondson, Patrick Lencioni og Brené Brown. Ég veit að þar er að finna ýmislegt mjög gott sem hjálpar okkur að byggja upp umhverfi sem virkar sem mótvægi gegn þeirri óvissu sem er til staðar.

En, á léttari nótum þá erum við í stjórn Mannauðs, ásamt Sigrúnu Kjartansdóttur framkvæmdastjóra, á fullu í undirbúningi Mannauðsdagsins sem verður haldinn í Hörpu föstudaginn næsta, 3.október. Þetta verður án efa besti Mannauðsdagurinn hingað til, ég get ekki beðið!“

Hvernig skipuleggur þú þig í vinnu?

„Ég hef tamið mér ákveðin vinnubrögð í gegnum árin. Ég reyni til dæmis eftir fremsta megni að halda pósthólfinu mínu hreinu. Það er langt síðan ég áttaði mig á því að það að hafa hreint í kringum sig hefur verulega góð áhrif á andlega líðan og mér finnst það sama eiga við um pósthólfið. 

Ég byrja daginn iðulega á því að svara öllum skilaboðum ef hægt er, því að þannig á ég auðveldar með að sökkva mér í stærri verkefni. 

Ég hef líka tekið upp á því að búa til hinar ýmsu sjálfvirku áminningar. 

Ef ég þarf ekki sjálf að muna hluti sem þurfa að eiga sér stað á ákveðnum tímum og get treyst því að vera minnt á það, af sjálfri mér í gegnum tæknina, þá getur heilaorkann farið í aðra mikilvægari hluti frá degi til dags.“

Hvenær ferðu að sofa á kvöldin?

„Það fer svolítið eftir því hvort ég hafi mætt í ræktina þann daginn. Þá daga sem ég fer í ræktina fer ég oft seinna upp í rúm, þá aðallega vegna þess að ég borða seinna og finn seinna fyrir syfju. 

Stefnan er þó alltaf tekin á að vera sofnuð fyrir miðnætti til þess að ná alla vega sjö tímum í svefn.“