Róbert hættir hjá HSÍ

Ekki liggur fyrir hver tekur við starfi framkvæmdastjóra af Róberti sem hefur unnið lengi hjá HSÍ.

Hvorki hefur náðst í Róbert né Jón Halldórsson, formann HSÍ.

Róbert tók við stöðu framkvæmdastjóra HSÍ af Einari Þorvarðarsyni 2017 en hann tók fyrst til starfa á skrifstofu sambandsins 2003. Róbert gegndi lengi starfi mótastjóra HSÍ.

Erfið staða HSÍ

Í viðtali í kvöldfréttum Sýnar í síðustu viku ræddi formaður HSÍ um fjárhagsstöðu sambandsins sem hann sagði vera grafalvarlega.

„Það er stóra áskorunin fyrir Handknattleikssambandið. Hún er stærri en ég átti von á, staðan er erfiðari og hún er alveg grafalvarleg. Við erum að róa öllum árum að finna leiðir hvernig við getum haldið áfram þessu afreksstarfi sem við höfum haldið úti undanfarin ár. Til að halda íslenskum handbolta á heimsmælikvarða. En það er ekkert sjálfgefið að það gerist,“ sagði Jón í Sportpakkanum á Sýn.

Að sögn Jóns hefur kostar árangur landsliða Íslands í handbolta sitt.

„Það er kannski skrýtið að segja það – það sem háir okkur er árangur. Við höfum náð frábærum árangri á undanförnum árum. Við erum á stórmótum ár eftir ár með karlaliðið, nú eru stelpurnar búnar að vera á stórmótum undanfarin ár og eru að fara á HM í desember og yngri landsliðin hafa náð frábærum árangri.“

Uppfært 13:20

Í tilkynningu á heimasíðu sinni staðfestir HSÍ að Róbert láti af störfum hjá sambandinu um áramótin.

„Ég tel þetta vera góðan tíma til að stíga frá borði og bjóða nýjum og ferskum vindum að koma inn í starfsemi HSÍ. Það hefur verið mikill heiður að fá að starfa fyrir sambandið í öll þessi ár og er ég þakklátur öllu því fólki sem ég hef starfað með í þennan tíma. Það eru forréttindi að hafa fengið að upplifa þessar stóru stundir með landsliðunum, þátttöku í stórmótum í blíðu og stríðu,“ segir Róbert í tilkynningunni.

„Það er eitthvað sem ég verð alla tíð þakklátur fyrir og mun minnast. Ég finn jafnframt að er nú rétti tíminn til breytinga fyrir mig. Ég hef nýverið lokið MBA námi og er spenntur að stíga inn á annan vettvang og þróast enn frekar sem einstaklingur og stjórnandi.“