Þessi í vinnunni sem þykist vita allt og hefur alltaf rétt fyrir sér

Sem getur verið óþolandi fyrir suma, þreytandi fyrir aðra.

Og jafnvel vandræðalegt á stundum því auðvitað hefur enginn alltaf rétt fyrir sér!

Við þekkjum öll þessa týpu. Því hún fyrirfinnst ekki aðeins í vinnunni, heldur kynnumst við oft svona karakterum í skóla, í vina- og vandamannahópnum. Jafnvel nágranna.

Hér eru átta sígild ráð byggð á umfjöllun Forbes um efnið.

Að sýna litlu sjálfstrausti samkennd

Rót vandans er í raun löskuð sjálfsmynd. Þar sem eitthvað er brotið í sjálfstraustinu hjá viðkomandi, eitthvað sem vísindin hafa löngum staðfest með rannsóknum. 

Þess vegna er gott að beita rökhugsuninni á okkur sjálf og sýna viðkomandi samkennd frekar en að láta viðkomandi fara í taugarnar á okkur.

Veldu slagina þína

Fæstir nenna að eyða miklu púðri í öll mál eða rökræður en eitt af því sem einkennir fólk sem telur sig vita allt best, er að geta ekki hætt. Sem þýðir að fyrir okkur hin, er það einfaldlega ekki þess virði að festast í einhverjum rökræðum um mál, sem jafnvel snerta okkur lítið en við nánast ósjálfrátt byrjum að malda í móinn eða að svara að við séum staðhæfingunum ekki sammála. Sem viðkomandi aðili myndi einmitt elska!

Veljum frekar hvaða mál eða rökræður við eyðum okkar púðri í. 

Vertu fyrirmynd á hinn veginn

Það sýnir merki um góða leiðtogahæfni að játa á sig mistök, kalla eftir skoðunum annarra og að hlusta eftir gagnrýni. Eitt af því sem við getum gert er að leggja áherslu á að vera góð fyrirmynd í hegðun sem er öfug við það að þykjast vita allt. Veldu að vera þessi fyrirmynd.

Skotheld gögn

Að girða okkur með bæði axlaböndum og belti getur stundum verið ágætis regla. 

 Þegar við sjálf leggjum fram staðreyndir er því mælt með því að við séum örugg um gögnin okkar. Til dæmis er ágætt að biðja ChatGPT um rökstuðning og linka við áræðanlegar heimildir ef við erum að styðjast við gervigreindina fyrir eitthvað.

Ekki missa húmorinn

Fólk sem telur sig vita allt á það til að vera mjög hörundsárt ef það upplifir að annað fólk lítur ekki svo á að á þeim sé mark takandi. Að hegða okkur alltaf vel hlýtur samt að vera okkar eigið markmið þannig að það að vera ekki dónaleg eða nota kaldhæðnina á viðkomandi er sú stefna sem við viljum taka.

Getum í raun frekar reynt að halda í gleðina og tekið húmorinn á málin (og þó aldrei meiðandi).

Að spyrja réttu spurninganna

Þegar við veljum að taka slaginn, skiptir síðan miklu máli að við gerum það á jákvæðan og kurteisan hátt og vöndum okkur við að spyrja réttu spurningana: Verum upplýst og undirbúin og höfum ekkert í frammi sjálf í flimtingum.

Gerum ekki lítið úr fyrir framan aðra

Ef við teljum ástæðu til að ræða sérstaklega við viðkomandi er mælt með því að gera það undir fjögur augu. Því það er aldrei rétt leið að gera lítið úr öðru fólki fyrir framan aðra.

Þá er líka mælt með því að vanda orðavalið þegar við tökum samtalið því þessir einstaklingar eru sagðir líklegir til að bera á milli. Óháð því hvort það sé haft alveg nákvæmlega rétt eftir.

Dæmi um rétta leið gæti til dæmis verið að ræða við viðkomandi um að það sé mikilvægt að fólk sem er feimnara og hlédrægara hafi svigrúm og þor til að taka þátt í fundum og þess vegna sé mikilvægt að tryggja það svigrúm, þótt það þýði oft að segja minna.

Ekki klaga í yfirmanninn

Ekki klaga í yfirmanninn nema þú teljir stöðuna þannig að hún sé eyðileggjandi eða að skaða starfið eða liðsheildina; vinnustaðamóralinn. Ef þetta samtal er tekið, vertu undirbúin/n.