Löggan óskaði Hildi­gunni til hamingju

Mikill fögnuður braust út að Hlíðarenda í gær þegar Valskonur tryggðu sér Evrópubikarinn í handknattleik fyrst íslenskra liða. Liðið vann þá 25-24 sigur á Porrino í æsispennandi leik.

Hildigunnur Einarsdóttir er lykilmaður í liði Vals og lyfti Evrópubikarnum í leikslok sem einn af fyrirliðum Valsliðsins.

Hildigunnur mun leggja skóna á hilluna að tímabilinu loknu en hún starfar dagsdaglega hjá lögreglunni. Og það er augljóst að samstarfsfélagar hennar hjá lögreglunni eru stoltir af sinni konu því eftir leik var birt kveðja til Hildigunnar þar sem henni var óskað til hamingju með árangurinn.

„Sérstakar hamingjuóskir til lögreglumannsins í Valsliðinu, Hildigunnar Einarsdóttur, en hún leggur handboltaskóna á hilluna í lok tímabilsins eftir frábæran feril,“ sagði meðal annars í færslu lögreglunnar.