Hundurinn tann­laus og ung­lingarnir vaktir með diskaglamri

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Vekjaraklukkan hringir klukkan 6:45 á morgnana en ég kemst sjaldnast á lappir fyrr en þremur korterum síðar.“

Hvað er það fyrsta sem þú gerir á morgnana?

Það fyrsta sem ég geri er að setja kaffivélina í gang. 

Á meðan hún hitnar tek ég upp úr uppþvottavélinni og læt glamra vel í diskum og glösum þangað til að að unglingarnir fara á lappir. 

Þegar það hefur tekist, rista ég brauð, helli upp á rótsterkt kaffi og fer með hundinn út í garð. 

Meðan hann hafði tennur þá kastaði ég hundakexi yfir garðflötina og horfði á meðan hann leitaði að því. 

En núna er hann tannlaus og á blautfæði svo það gengur ekki lengur.“

Á skalanum 1-10, hversu mikill grallari ertu?

„Grallaraskapurinn hjá mér sveiflast á milli eins og tíu, allt eftir því hvort ég er á kafi í verkefni eða í lausum gír. Þegar ég er djúpt sokkinn á ég í alvöru erfitt með að detta í hug sniðuga hluti til að stríða samstarfsfólki og er ekki móttækilegur fyrir grallaraskap. Teymið er löngu búið að læra inn á mig og stundum gera þau í því að trufla mig viljandi þegar þetta er staðan. En þegar ég er á milli verkefna eða í smá pásu, þá springur grallaraorkan fram. 

Ég á ýmis trix til að drepa tímann þegar ég er í lausum gír, til dæmis ganga frá í eldhúsinu, safna saman óhreinu leirtaui frá samstarfsfólki eða bursta tennur og þá veit teymið að grallarinn er kominn á vakt. Á föstudögum vil ég hafa grúví tónlist og jafnvel taka nokkur dansspor.“

Í hvaða verkefni ertu að vinna helst í þessa dagana?

„Það eru alltaf margir boltar á lofti í indó. Við opnuðum nýverið fyrir sameiginlega reikninga í dúett sem er paraupplifun í fjármálum og erum að fá alveg frábærar viðtökur. Við sjáum mikla aukningu bæði í nýskráningum og notkun og erum nú með rúmlega 82.000 viðskiptavini. Þar af er um helmingur sem notar indó kortið í hverri einustu viku í öll sín daglegu útgjöld og sífellt fleiri kjósa að nota indó sem sinn launareikning.

Svo tók ég nýverið stöðu framkvæmdastjóra indó og það eru auðvitað ný verkefni og nýjar áskoranir sem fylgja því að taka við þeirri stöðu af meðstofnanda mínum. Mitt hlutverk sem framkvæmdastjóri er að setja stefnu og markmið. Mikilvægast að ná í framúrskarandi fólk og gefa því frelsi til að ákveða leiðir og fullan stuðning til að framkvæma. Það veitir mér mikla orku að hrærast með teyminu.

Á hverjum degi leitast ég eftir að eiga óformleg samtöl við viðskiptavini og teymið til að fá endurgjöf á það hvar við getum gert betur, fylgjast með stöðu verkefna og leita að leiðum til að hreyfa hlutina hraðar.

Hvernig skipuleggur þú þig í vinnu?

Það hefur gefist mér vel að nota stund á sunnudegi til að horfa yfir komandi viku og undirbúa í huganum mikilvægu verkefnin og samtölin framundan. 

Á morgnana, yfirleitt á meðan ég bursta tennurnar, skoða ég dagbókina og svo geng svo ég til vinnu. Þann tíma nota ég til að skipuleggja daginn. 

Í lok dags, loka ég deginum með því að skrifa í dagbókina og geng síðan heim og reyni að skilja við vinnudaginn á leiðinni heim.

Þetta hljómar skipulegar en það er í alvörunni. Það er sífelld áskorun að forgangsraða því sem kallar eftir athygli í metnaðarfullu og ört vaxandi fyrirtæki og ég geri mér vel grein fyrir því að einn kemst ég ekki neitt. Þannig að ég er duglegur að fá hjálp frá teyminu og það skemmtilegasta sem ég veit er að sjá ungt fólk vaxa hratt og takast á við nýjar áskoranir. Hlutir hreyfast hratt hjá indó.“

Hvenær ferðu að sofa á kvöldin?

„Ég er oftast kominn upp í rúm á milli tíu og ellefu. Yfirleitt les ég þangað ég sofna.“