Benoný fagnaði eftir fund með Bolt

Stockport sagði frá því á samfélagsmiðlum sínum að Bolt hefði rætt við leikmenn Stockport um sinn einstaka feril og hvað þyrfti til að komast á toppinn.

Þetta virðist hafa haft góð áhrif því Stockport vann og er nú með 68 stig í 5. sæti deildarinnar, eftir 39 leiki af 46, og komið langt með að tryggja sig í umspil liðanna í 3.-6. sæti um síðasta lausa sætið í B-deild á næstu leiktíð.

Benoný, sem skoraði tvö marka Íslands í sigri á Skotum í vináttuleik með U21-landsliðinu á Spáni í vikunni, lék síðustu tíu mínúturnar fyrir Stockport í dag.

Jón Daði Böðvarsson gat ekki leikið með Burton vegna meiðsla í kálfa. Burton, sem er að hluta í eigu Íslendinga, er í fallsæti með 36 stig, sex stigum frá næstu öruggu sætum nú þegar átta umferðir eru eftir. Þjálfari liðsins bindur vonir við að Jón Daði verði með á lokasprettinum en hann hefur skorað fjögur mörk í tíu leikjum fyrir Burton.

Guðlaugur Victor á bekknum hjá botnliðinu

Í næstefstu deildinni var Guðlaugur Victor Pálsson á bekknum hjá Plymouth sem gerði markalaust jafntefli á útivelli við Watford. Guðlaugur Victor kom því aðeins við sögu í einum hálfleik, í sex keppnisleikjum Plymouth í mars, auk þess að spila fyrri landsleik Íslands við Kósovó.

Plymouth er á botni ensku B-deildarinnar með 34 stig eftir 39 leiki, fimm stigum frá næstu öruggu sætum með aðeins sjö leiki til stefnu.