Fá 21 árs Tékka í miðri mark­varðakrísu

Tottenham greiðir 12,5 milljónir punda fyrir Kinsky sem mætir til Lundúna í miðri markvarðakrísu hjá félaginu.

Gulielmo Vicario, aðalmarkvörður Tottenham, hefur nefnilega verið frá keppni síðan hann meiddist í ökkla í 4-0 sigrinum gegn Manchester City 24. nóvember.

Fraser Forster hefur fyllt í skarðið fyrir Vicario en missti af 2-1 tapleiknum gegn Newcastle í gær vegna veikinda.

Hinn 25 ára gamli Brandon Austin lék því sinn fyrsta alvöru leik fyrir Tottenham í gær, eftir að hafa verið á mála hjá félaginu í níu ár.

Kinsky, sem er U21-landsliðsmarkvörður, skrifaði undir samning við Tottenham sem gildir til ársins 2031 og bíður nú eftir atvinnuleyfi. 

Tottenham hefur aðeins unnið tvo af síðustu ellefu leikjum sínum og er í 12. sæti ensku úrvalsdeildarinnar.