Harpa Valey tryggði Sel­fossi stig

Eftir leikinn í kvöld er Fram með tíu stig í 2. sæti deildarinnar, fjórum stigum á eftir toppliði Vals. Selfoss er í 4. sæti með sex stig. Selfyssingar eru taplausir í síðustu fjórum leikjum sínum.

Fram var með frumkvæðið í fyrri hálfleik en Selfoss vann á eftir því sem á hann leið. Staðan var jöfn í hálfleik, 15-15.

Selfyssingar byrjuðu seinni hálfleikinn betur og komust með fjórum mörkum yfir, 22-18. Framarar svöruðu með fjórum mörkum í röð og jöfnuðu í 22-22.

Þegar rúmar fimm mínútur voru eftir kom Harpa Valey Selfossi tveimur mörkum yfir, 26-24. Fram skoraði næstu þrjú mörk leiksins en Harpa Valey skoraði svo jöfnunarmarkið þegar 42 sekúndur voru eftir. Fram fékk síðustu sóknina en hún fór forgörðum. Lokatölur 27-27.

Perla Ruth Albertsdóttir skoraði sjö mörk úr sjö skotum fyrir Selfoss. Katla María Magnúsdóttir var með sex mörk og Harpa Valey fimm. Cornelia varði þrettán skot í marki Selfyssinga (33 prósent).

Alfa Brá var markahæst hjá Fram með sjö mörk og Steinunn Björnsdóttir skoraði fimm. Markverðir Framara vörðu aðeins samtals sex skot (18,2 prósent).