Haukur og fé­lagar skammt frá toppliðunum eftir sterkan sigur

Füchse Berlin leiddi með einu marki eftir jafnan og spennandi fyrri hálfleik gegn Dínamó Búkarest en fann sig fjórum mörkum undir um miðjan seinni hálfleik. Þeim tókst að minnka muninn í næstu sóknum og voru einu marki undir þegar tæpar sjö mínútur voru eftir.

Þá var orkan hins vegar á þrotum, heimamenn skoruðu fjögur mörk í röð og bættu svo meira við eftir að hafa brotið gestina niður og gert út af við leikinn. Lokatölur 38-31.

Haukur Þrastarson lék með Dínamó, skoraði tvö mörk úr fjórum skotum og gaf fjórar stoðsendingar.

Fredericia skilið eftir á botninum

Á sama tíma mættust neðstu lið riðsilsins, RK Eurofarm Pelister og Fredericia HK, lærisveinar Guðmundar Guðmundssonar.

Fredericia byrjaði betur og hélt þriggja marka forystu í fyrri hálfleik. Það var ekki sami bragur yfir liðinu í seinni hálfleik, aðeins ellefu mínútum eftir að hann hófst voru gestirnir búnir að snúa spilinu við og leiddu sjálfir með þremur mörkum.

Fredericia minnkaði muninn og veitti samkeppni eftir það en átti ekki afturkvæmt. 25-23 lokaniðurstaðan.

Einar Þorsteinn Ólafsson og Arnór Viðarsson gerðu báðir eitt mark fyrir Fredericia.

Staðan eftir fyrri umferðina

Fyrri umferð er nú lokið og öll lið í riðlinum hafa leikið sjö leiki. 

Fredericia er í neðsta sæti með tvö stig, jafnt Wisla Plock en stigi á eftir RK Eurofarm Pelister. 

Dínamó Búkarest er með tíu stig, tveimur stigum á eftir toppliðunum PSG og Veszprém.