„Þetta er bara byrjunin“

Íslensku strákarnir léku til verðlauna á EM sem lauk um helgina. Þeir töpuðu fyrir Danmörku í undanúrslitunum, 34-26, og svo fyrir Ungverjalandi, 34-36, í leiknum um bronsið. 

Fjórða sætið var því niðurstaðan sem er jöfnun á þriðja besta árangri Íslendinga á EM í þessum aldursflokki. Ísland varð Evrópumeistari 2003 með leikmenn á borð við Ásgeir Örn Hallgrímsson, Arnór Atlason og Björgvin Pál Gústavsson fremsta í flokki og vann svo silfur á EM 2018 þar sem Haukur Þrastarson, Viktor Gísli Hallgrímsson og Dagur Gautason fóru fyrir íslenska liðinu. Ísland endaði í 4. sæti á EM 2008 og jafnaði þann árangur um helgina.

„Við byrjuðum mótið á góðum sigrum í riðlinum. Svartfjallalandsleikurinn var smá tæpur en við gerðum vel þar. Þaðan lá leiðin í milliriðla og þar unnum við frábæran sigur á Svíþjóð. Það var risastór sigur og alvöru liðssigur. Svo spiluðum við frábærlega á móti Spáni, vorum yfir í fimmtíu mínútur og vorum óheppnir að tapa þeim leik,“ sagði Dagur í samtali við Vísi í gær, er hann var beðinn um að fara yfir Evrópumótið.

„Við vorum ekki góðir í undanúrslitaleiknum gegn Dönum og það var verðskuldað tap. Síðan er þessi Ungverjaleikur í lokin ofboðslega svekkjandi. En þetta var virkilega gott mót og ég er mjög stoltur af árangri liðsins. Við stóðum okkur mjög vel.“

Dagur segir að markmið íslenska liðsins á EM hafi ekki verið meitluð í stein fyrir mótið.

„Það voru engin föst markmið. Það var bara nýtt markmið eftir hvern leik. Fyrst var að komast á HM á næsta ári og svo þegar við unnum Svíþjóð var markmiðið að sjálfsögðu að komast í undanúrslit og vinna mótið. Það tókst ekki en við stóðum okkur vel og unnum stóra sigra,“ sagði Akureyringurinn.

Mesta lagi tvær mínútur

Hann gat ekki klárað bronsleikinn gegn Ungverjalandi þar sem hann fékk rautt spjald á 42. mínútu. Ranglega að hans sögn.

„Þótt ég segi sjálfur frá var það fáránlegur dómur. Ég var sakaður um að hafa stoppað hann með olnboganum en á upptöku sást að ég snerti ekki andlitið á honum. Hann kom bara beint á kassann á mér. Þetta var í mesta lagi tvær mínútur,“ sagði Dagur.

„Þetta var auðvitað mjög svekkjandi því við vorum í góðri stöðu þegar rauða spjaldið kom. Þetta var rangur dómur.“

Dagur spilaði stórvel á EM og var næstmarkahæsti leikmaður íslenska liðsins með 51 mark. Að móti loknu var hann valinn í úrvalslið þess.

„Það var mjög skemmtileg upplifun og það kom mér á óvart hversu stórt þetta er. EM er risa mót og líka vel gert hjá okkur að vera meðal fjögurra efstu liðanna. En með úrvalsliðið, ég er mjög glaður og stoltur að vera valinn besti miðjumaður mótsins. Ég er í góðum félagsskap í þessu liði. Þetta er bara byrjunin,“ sagði Dagur sem var einnig valinn í úrvalslið Opna Evrópumótsins í fyrra.

Dagur fær lítið frí eftir EM því frá Svartfjallalandi hélt hann til Ungverjalands þar sem KA er í æfingaferð. Hann ætlar að nýta meðbyr sumarsins til góðra verka með KA-liðinu í vetur.

„Ég fer mjög mótíveraður inn í tímabilið með KA og er virkilega spenntur. Það var mjög skemmtilegt að vera valinn í úrvalsliðið og þetta gefur mér bara auka bensín að hjálpa uppeldisfélaginu í Olís-deildinni. Ég held að þetta verði mjög skemmtilegt tímabil hjá okkur í KA,“ sagði Dagur. 

Úr sigursælum árgangi 

Hann var einn þriggja KA-manna í íslenska liðinu sem spilaði á EM ásamt Jens Braga Bergþórssyni og Magnúsi Degi Jónatanssyni. Þessir strákar eru vanir því að ná árangri og unnu meðal annars Partille Cup í 4. flokki.

„Við unnum allt sem hægt var að vinna í 4. flokki og töpuðum ekki leik í rúm tvö ár. Svo urðum við bikarmeistarar á þessu ári með 3. flokki,“ sagði Dagur sem er, þrátt fyrir að vera aðeins átján ára, í stóru hlutverki í meistaraflokki KA. Hann segir að KA-menn eigi eftir að setjast niður og setja sér markmið fyrir tímabilið en þeir stefni hátt.

„Mér finnst alveg klárt eftir þessar liðsstyrkingar og menn orðnir árinu eldri að við ætlum okkur stóra hluti,“ sagði Dagur.

Frábært að eiga þau að

Hann kemur úr mikilli handboltafjölskyldu því móðir hans er Martha Hermannsdóttir og Heimir Örn Árnason faðir hans. Bæði tvö léku lengi hér heima og erlendis og með landsliðinu.

„Maður var líka í fótbolta en hausinn var alltaf á handboltanum. Markmiðið var alltaf að ná sem lengst í handboltanum og maður lifir fyrir hann,“ sagði Dagur sem segist fá góðan stuðning að heiman.

„Klárlega. Það er gott að hafa mömmu og pabba. Hann kom í síðustu leikina á EM og það er gott að fá stuðning og ráð frá þeim; hvað maður á að gera og hverjum maður á að treysta. Það er frábært að eiga þau að.“

Dagur er ófeiminn að segja að hann stefni alla leið í handboltanum; í atvinnumennsku, landsliðið og allan þann pakka.

„Allt þetta hefðbundna. Ég ætla mér þangað, í landsliðið og toppinn í atvinnumennsku, þó maður sé ekki of sjálfsöruggur. Ég held að það sé draumur hvers ungs leikmanns og það er klárlega það sem ég ætla mér að gera í framtíðinni,“ sagði Dagur að lokum.