Gummi Gumm velur Höllu Hrund í liðið sitt

Guðmundur birti grein á Vísi sem ber heitið „Ég vel Höllu Hrund í liðið mitt“. Þar fer þjálfarinn yfir mannkosti forsetaframbjóðandans. Guðmundur tiltekur sérstaklega afstöðu hennar til náttúruverndar en hann hefur látið sig þau mál varða á undanförnum árum.

„Innlend og ekki síst erlend stórfyrirtæki munu á komandi misserum og árum seilast í auknum mæli eftir náttúruauðlindum þjóðarinnar og nægir þar að nefna, firðina okkar, vatnið, vindinn, sandinn, hálendið, gufuaflið og auðvitað vatnsorkuna. Við þurfum forseta sem stendur af einurð með þjóðinni og hefur menntun og yfirburða skilning á þessu sviði,“ skrifar Guðmundur í grein sinni.

Hann lýkur svo greininni á að segja Íslendingar þurfi Höllu Hrund í liðið sitt; hún verði íslensku þjóðinni góður liðsmaður í framtíðinni. 

Á laugardaginn, sama dag og Íslendingar ganga til kosninga, mæta strákarnir hans Guðmundar í Fredericia Álaborg í hreinum úrslitaleik um danska meistaratitilinn. Fredericia tryggði sér oddaleik með því að vinna Álaborg, 31-30, í fyrradag.

Guðmundi var orða vant í viðtali eftir leikinn í fyrradag en öllum mátti ljóst vera hversu stoltur hann var af liðinu sínu. 

„Stuðningurinn og andrúmsloftið hér. Ég hef aldrei upplifað þetta áður,“ sagði hann í viðtali við Fredericia Dagbladet.

„Ég hef nú upplifað margt á mínum ferli. Til að mynda leiki í stóru höllunum í Þýskalandi en ekkert kemst í líkingu við þetta. Það er svo mikið hjarta og sál í þessu félagi. Stuðningsmennirnir frábærir.“

Landsliðsmaðurinn Einar Þorsteinn Ólafsson leikur með Fredericia sem vann til bronsverðlauna í dönsku úrvalsdeildinni í fyrra. Það voru fyrstu verðlaun félagsins í 43 ár.